இமயமலையைப் பறந்தபடி சுற்றிப்பார்க்க கைரோகாப்டர் சுற்றுலா சேவை அறிமுகம்...

டேராடூன் உத்தரகண்ட்டில், இமயமலையின் அழகை வானில் பறந்தபடி சுற்றிப்பார்க்க, நாட்டிலேயே முதல்முறையாக, 'கைரோகாப்டர்' சுற்றுலாவை அம்மாநில அரசு அறிமுகப்படுத்த உள்ளது. இதற்கான சோதனை ஓட்டம் சமீபத்தில் வெற்றிகரமாக நடத்தி முடிக்கப்பட்டது.

புதிய முயற்சி

உத்தரகண்டில், முதல்வர் புஷ்கர் சிங் தாமி தலைமையில் பா.ஜ., ஆட்சி நடக்கிறது.

இங்குள்ள இமயமலையின் அழகைப் பார்த்து ரசிக்க, சுற்றுலா பயணியர் ஆண்டுதோறும் ஆயிரக்கணக்கில் குவிகின்றனர்.

மாநில அரசுக்கான வருவாயில், சுற்றுலாத்துறை முக்கிய பங்களிப்பதால், அதில் பல்வேறு புதிய முயற்சிகளை மாநில அரசு செய்து வருகிறது.

இதன் ஒரு பகுதியாக, இமயமலையின் அழகை வானில் பறந்தபடி சுற்றிப் பார்க்க, 'கைரோகாப்டர்' சுற்றுலா சேவையை அம்மாநில அரசு துவங்க உள்ளது. 'கைரோகாப்டர்' என்பது, ஹெலிகாப்டரை விட அளவில் சிறியது. இதில், இருவர் மட்டுமே பயணிக்க முடியும். >

மலைப்பிரதேசங்களில் பறக்க வசதியான இந்த வாகனம், பாதுகாப்பானது என்றும் கூறப்படுகிறது.

உத்தரகண்ட் சுற்றுலா வளர்ச்சி வாரியமும், 'ராஜாஸ் ஏரோஸ்போர்ட்ஸ் அண்டு அட்வென்ச்சர்ஸ்' என்ற தனியார் நிறுவனமும் இணைந்து, இமயமலை தொடரில் கைரோகாப்டர் சுற்றுலா சேவையை நம் நாட்டில் முதல்முறையாகத் துவங்க உள்ளன.

இதற்கான சோதனை ஓட்டம், ஹரித்வாரில் உள்ள பைராகி முகாமில் கடந்த 16ம் தேதி வெற்றிகரமாகச் செய்து முடிக்கப்பட்டது.

இது குறித்து உத்தரகண்ட் சுற்றுலா வளர்ச்சி வாரியத்தின் கூடுதல் தலைமை நிர்வாக அதிகாரி கர்னல் அஸ்வினி பந்திர் கூறியதாவது:

இமயமலை தொடரில், சுற்றுலா பயணியர் இதுவரை பார்த்திராத இயற்கை எழில் கொண்ட பகுதிகளுக்கு அழைத்துச் செல்வதே கைரோகாப்டர் சேவையைத் துவங்குவதற்கான நோக்கம். இந்த பயணம் பாதுகாப்பானதாகவும், சாகசம் நிறைந்ததாகவும் இருக்கும்.

முறையான பயிற்சி

இதற்காக, ஐரோப்பிய நாடான ஜெர்மனியிலிருந்து, கைரோகாப்டர் வாகனங்கள் வாங்கப்பட்டுள்ளன. சிறப்புப் பயிற்சி பெற்ற ஜெர்மனி நாட்டு பைலட்கள் இந்த வாகனத்தை இயக்க உள்ளனர்.

முறையான பயிற்சிகளுக்குப் பின், நம் பைலட்கள் இந்த வாகனங்களை இயக்கத் துவங்குவர். இதற்காகவே, விமானப் போக்குவரத்துத் துறை உதவியுடன் உத்தரகண்டின் பல்வேறு பகுதிகளில், சிறிய அளவிலான இறங்கு தளங்களை உருவாக்கத் திட்டமிட்டுள்ளோம்.

இவ்வாறு அவர் கூறினார்.