தீபாவளி சமயங்களில் ஏற்படும் விபத்துகளை தடுக்கும் வகையில், தீயணைப்பு துறை சார்பில் தயாரிக்கப்பட்டுள்ள விழிப்புணர்வு படம் ஒன்றில், நடிகர் சூர்யா நடித்துள்ளார்.
தீபாவளி பண்டிகையின்போது ஏற்படும் பட்டாசு விபத்துகளை தடுக்க தீயணைப்பு துறையினர் கடந்த ஒரு வார காலமாக சென்னையின் பல்வேறு பகுதிகளில் விழிப்புணர்வு பிரச்சாரம் நடத்தி வருவதுடன் விழிப்புணர்வு ஒத்திகையும் நடத்தி காண்பித்து வருகின்றனர். மேலும் பள்ளி கல்லூரிகளுக்கும், விபத்தில்லா தீபாவளியை கொண்டாடுவது குறித்து சுற்றறிக்கை அனுப்பப்பட உள்ளது. இதற்கிடையே நடிகர் சூர்யாவை வைத்து விழிப்புணர்வை படத்தை தீயணைப்பு துறையினர் தயாரித்துள்ளார்கள். 2 நிமிடம் ஓடும் இந்த படத்தில் சூர்யா பொது மக்களுக்கு அறிவுரை வழங்குகிறாராம். படத்திற்கு பின்னணி இசை சேர்க்கும் வேலை தற்போது நடந்து வருகிறதாம். அந்த வேலை முடிந்ததும் படத்தை பத்திரிக்கையாளர்களுக்கு போட்டு காட்டிவிட்டு திரையரங்குகளில் வெளியிடவும், தொலைகாட்சிகளில் வெளியிடவும் திட்டமிட்டுள்ளதாக தீயணைப்புத்துறை இயக்குனர் தெரிவித்துள்ளார்.. இந்த படத்தில் சூர்யா தானாக முன்வந்து நடித்ததுடன் அதற்காக சம்பளம் எதுவும் வாங்கவில்லை என்பது குறிப்பிடத்தக்கது.
|