டேட்டிங் போகும் இளைஞர்களின் கவனத்திற்கு !

அமெரிக்காவில் டேட்டிங்கில் ஈடுபடும் இளைய சமுதாயத்தினரில், மூவரில் ஒருவர், உடல், மனம் மற்றும் பாலியல் ரீதியான துன்புறுத்தலுக்கு உள்ளாவதாக சமீபத்திய ஆய்வு தெரிவித்துள்ளது. 

டேட்டிங் :

இளைய சமுதாயத்தினர், தங்களின் நட்பு வட்டாரத்தை அதிகரித்து கொள்ளவும், ஆண்களும், பெண்களும் ஒருவரை ஒருவர் புரிந்து கொள்ளவும், விடுமுறை நாட்களில், உணவு விடுதிகள், திரையரங்கங்கள், சுற்றுலா தளங்கள், பொழுதுபோக்கு பூங்காக்கள் ஆகிய இடங்களுக்கு செல்வதை வழக்கமாக கொண்டிருக்கின்றனர். இதனையே டேட்டிங் என்று கூறுகின்றனர்.

அமெரிக்காவின் கலிபோர்னியாவை சேர்ந்த பிரபல நிறுவனம் ஒன்று டேட்டிங் குறித்த ஆய்வு மேற்கொண்டது, டேட்டிங்கில் ஈடுபட்ட 1,058 பேரிடம் நடந்த இந்த ஆய்வில், மூவரில் ஒருவர், பாலியல் ரீதியான துன்புறுத்தலுக்கு ஆளாகின்றனர் எனவும். இதில் பெண்களில் 41 சதவீதம் பேர் பாலியல் ரீதியான பிரச்னைகளுக்கு ஆளாகின்றனர். 37 சதவீதம் ஆண்கள், பெண்களால் துன்புறுத்தப்படுகின்றனர். இது தவிர, நட்பு ரீதியான டேட்டிங்கில், அதிகம் பேர், பாலியல் உணர்ச்சிகளால் தூண்டப்பட்டு, தன்னுடன் வந்தவர்களை துன்புறுத்துகின்றனர். அதற்கு உட்பட மறுப்பவர்கள், தாக்கப்படுகின்றனர். நினைத்தது ஒன்று, நடந்தது ஒன்று என்ற ஏமாற்றத்தின் காரணமாக, டேட்டிங் செல்லும் பலரும், உளவியல் ரீதியான பாதிப்புகளுக்கு ஆளாகின்றனர். பொதுவாக, ஆண்கள் மற்றும் பெண்கள், சம விகிதத்தில் பாதிக்கப்படுகின்றனர். வயது வரம்பை பொறுத்து, இந்த எண்ணிக்கையில் சற்று மாற்றம் ஏற்படுகிறது. இதனால், டேட்டிங் செல்லும் இளைஞர்கள் கவனமாக இருப்பது நல்லது. இவ்வாறு அந்த ஆய்வறிக்கையில் தெரிவிக்கப்பட்டுள்ளது.