எச்4 விசா ரத்து செய்வது குறித்து அமெரிக்க மக்களிடம் கருத்து கேட்க அதிபர் டிரம்ப் முடிவு!

எச்4 விசாவை ஜனவரியில் இருந்து ரத்து செய்யும் அமெரிக்க அதிபர் டிரம்பின் முடிவுக்கு எதிர்ப்பு வலுத்து வருவதால், இது பற்றி மக்களிடம் கருத்து கேட்க டிரம்ப் முடிவு செய்துள்ளார். 

அமெரிக்காவில் குடியுரிமை பெறாமல், அங்கு தங்கி பணியாற்ற வெளிநாட்டவர்களுக்கு எச்1பி விசா வழங்கப்பட்டு வருகிறது. இந்த விசாவை அதிகளவில் பெறுபவர்கள் இந்திய ஐடி ஊழியர்களே. 

எச்1பி விசாவால் அமெரிக்க இளைஞர்களின் வேலைவாய்ப்பு பறிபோவதாக குற்றம் சாட்டப்படுகிறது. இதனால், டொனால்ட் டிரம்ப் அதிபரான பிறகு, எச்1பி விசா  நடைமுறையில் பல்வேறு கெடுபிடி விதிமுறைகளை வகுத்தார்.

இதை எதிர்த்து முன்னணி ஐடி நிறுவனங்கள் நீதிமன்றத்தில் வழக்கு தொடர்ந்துள்ளன. இந்த நிலையில், கூகுள், பேஸ்புக், மைக்ரோசாப்ட் உள்ளிட்ட முன்னணி ஐடி நிறுவனங்களின் கூட்டமைப்பான ‘கேம்பிடி அமெரிக்கா’, உள்துறை அமைச்சர் கிறிஸ்ட்ஜன் நீல்சன், அமெரிக்க குடிமக்கள் மற்றும் குடியேற்ற சேவை இயக்குநர் பிரான்சிஸ் சிஸ்னா ஆகியோருக்கு கடிதம் ஒன்றை அனுப்பி உள்ளது.

அதில், ‘எச்1பி விசா நடைமுறையில் 3 முக்கிய மாற்றங்களை தற்போதைய அரசு மேற்கொண்டு உள்ளது. அரசு வகுத்த விதிமுறையை குடியேற்றத் துறையே மீறி செயல்படுகிறது. பல்வேறு காரணங்களை காட்டி, இந்த விசா விண்ணப்பங்களை நிறுத்தி வைப்பது கணிசமாக அதிகரித்து வருகிறது.

 அரசின் விதிமுறைகளில் நிலையான தெளிவான விளக்கங்கள் இல்லாததால் குழப்பநிலை ஏற்படுகிறது. எனவே, திறமை வாய்ந்த அமெரிக்க மற்றும் வெளிநாட்டு பணியாளர்களை அமர்த்தும் நிறுவனங்கள் கடுமையாக பாதிக்கப்பட்டு உள்ளன’ என குறிப்பிடப்பட்டுள்ளது. 

ஒவ்வொரு ஆண்டும் கல்வி உள்ளிட்ட பல்வேறு தகுதியின் அடிப்படையில், அமெரிக்காவில் 65,000 பேருக்கு மட்டுமே எச்1பி வழங்கப்படுகிறது.

இந்நிலையில், எச்1பி விசா பெற்றவர்களுடன் செல்லும் கணவன் அல்லது மனைவி, அமெரிக்காவில் பணியாற்றவும், தொழில் செய்யவும் எச்4 விசா வழங்கப்பட்டு வருவதை அடுத்த ஆண்டு ஜனவரியில் ரத்து செய்யப் போவதாக டிரம்ப் நிர்வாகம் அறிவித்து உள்ளது.

 இதனால், எச்4 விசா பெற்ற 70 ஆயிரம் இந்தியர்கள் பாதிக்கப்படுவார்கள். இதற்கும் ஐடி நிறுவனங்கள், அமெரிக்க எம்பி.க்கள் கவலை தெரிவித்து உள்ளனர்.

இந்த நிலையில், எச்4 விசா ரத்து செய்வது குறித்து பொதுமக்களிடம் கருத்து கேட்டு பின்னர் முடிவு செய்வதாக டிரம்ப் நிர்வாகம் எம்பி.க்களிடமும், கார்ப்பரேட் நிறுவனங்களிடமும் உறுதி அளித்துள்ளது.