ஒலிம்பிக் 2021,தொடர் ஓட்டத்தில் களமிறங்கும் தமிழகத்தின் தங்கங்கள்

ஒலிம்பிக் 2021, தொடர் ஓட்டத்தில் களமிறங்கும் தமிழகத்தின் தங்கங்கள்
ஜப்பான்,டோக்கியோ ஒலிம்பிக் போட்டியில் தமிழகத்தைச் சேர்ந்த 5 தடகள வீரர், வீராங்கனைகள் களமிறங்குகின்றனர்.பதக்கம் வெல்வோம் என்றும் நம்பிக்கை தெரிவித்துள்ளனர்.

இம் மாதம் (ஜூலை) 23 ஆம் தேதியன்று 2021 ஆம் ஆண்டிற்கான ஒலிம்பிக் போட்டிகள் ஜப்பான் நாட்டின் டோக்கியோவில் நடைபெறவுள்ளன.
இதில் தமிழகத்தின் திருச்சி மாவட்டத்தைச் சேர்ந்த ஆரோக்கிய ராஜீவ்,தனலட்சுமி சேகர், சுபா வெங்கடேசன் மதுரை மாவட்டத்தைச் சேர்ந்த ரேவதி வீரமணி, ராமநாதபுரம் மாவட்டத்தைச் சேர்ந்த நாகநாதன் ஆகியோர் இந்தியாவின் சார்பில் தொடர் ஓட்ட வீரர்களாக ஒலிம்பிக் போட்டியில் களம் காண உள்ளனர்.

*ஆரோக்கிய ராஜீவ் (ஆண்கள்  4×400 மீ தொடர் ஓட்டம்)
*ரேவதி வீரமணி (கலப்பு   4×400 மீ தொடர் ஓட்டம்)
*தனலட்சுமி சேகர் (கலப்பு 4×400 மீ தொடர் ஓட்டம்)
*சுபா வெங்கடேசன் (கலப்பு 4×400 மீ தொடர் ஓட்டம்)
*நாகநாதன் பாண்டி (ஆண்கள் 4×400 மீ தொடர் ஓட்டம்)

ஆரோக்கிய ராஜீவ் இராணுவ வீரர் ஆவார். அர்ஜுனா விருது பெற்றவர்.லால்குடி பகுதியைச் சேர்ந்த இவர் தேசிய அளவிலான போட்டிகளில் பதக்கம் பெற்றவர் ஆவார். மூன்று முறை ஆசியப் போட்டிகளில் பங்குபெற்று பதக்கம் பெற்றுள்ளார். இவர் இரண்டாவது முறையாக ஒலிம்பிக் போட்டியில் பங்கேற்க உள்ளார்.

திருச்சி திருவெறும்பூர் அருகில் கூத்தைப்பார் பகவதி புரத்தைச் சேர்ந்தவர் சுபா வெங்கடேசன். தேசிய அளவிலான போட்டிகளில் கலந்து கொண்டு வெற்றி வாகை சூடிய இவர் முதன் முறையாக ஒலிம்பிக்கில் பங்கேற்கிறார்.

மதுரை சக்கிமங்கலம் பகுதியைச் சேர்ந்த ரேவதி வீரமணி, தனது பாட்டியின் அரவணைப்பில் வளர்ந்தவர்.மதுரை விளையாட்டு மேம்பாட்டு ஆணையத்தின் பயிற்சியாளர் கண்ணன் இவரது வெற்றிக்கு முக்கியப் பங்காற்றி உள்ளார்.

இராமநாதபுரம்,கமுதி அருகில் உள்ள சிங்கப்புலியாபட்டி கிராமத்தைச் சேர்ந்தவர் நாகநாதன். இவர் காவலராக உள்ளார். ஒலிம்பிக்கிற்கு தேர்வாகி அநேகரின் வாழ்த்துக்களைப் பெற்று வருகிறார்.

குண்டூர் பகுதியைச் சேர்ந்தவர் தனலட்சுமி சேகர்.இவர் இந்தியாவின் முன்னணி வீராங்கனைகளான டூட்டி சந்த் மற்றும் பி.டி.உஷா ஆகியோரின் சாதனைகளை முறியடித்தவர். இவர் தற்போது ஒலிம்பிக் போட்டியில் முதன் முறையாக பங்கேற்கிறார்.