|
|||||
குழாய் மூலம், 'காஸ்' திட்டம் பிரதமர் மோடி துவக்கி வைத்தார்! |
|||||
நாடு முழுவதும், 122 மாவட்டங் களில், குழாய் மூலம், சமையல் எரிவாயு (காஸ்) வழங்கும் திட்டத்துக்கு, பிரதமர் மோடி, அடிக்கல் நாட்டினார். தமிழகத்தில், சேலம், கோவை நகரங்கள், இந்த திட்டத்தின் கீழ் பயனடைய உள்ளன.சமையல் எரிவாயுவை, நேரடியாக குழாய் மூலம், சமையல் அறைக்கே எடுத்துச் செல்லும் திட்டம், சில நகரங்களில் மட்டுமே, தற்போது செயல்படுத்தப்பட்டு வருகிறது. நாடு முழுவதும், 18 மாநிலங்களில், 122 மாவட்டங்களில், இந்த திட்டம் விரிவுபடுத்தப்படுகிறது.'குழாய் மூலம், நகரங்களுக்கு எரிவாயு வழங்கும் திட்டம்' என, இதற்கு பெயரிடப்பட்டு உள்ளது. இதற்கான அடிக்கல் நாட்டு விழா நடந்தது. டெல்லியிலிருந்து, 'வீடியோ கான்பரன்ஸ்' மூலம், இந்த திட்டத்துக்கு பிரதமர் மோடி, அடிக்கல் நாட்டினார். அப்போது அவர் பேசியதாவது: நாட்டின் பொருளாதார வளர்ச்சி அதிகரிப்பதால், எரிசக்திக்கான தேவையும் அதிகரிக்கிறது சுற்றுச்சூழலை பாதிக்காத வகையில், எரிசக்தியை பயன்படுத்த வேண்டிய கட்டாயம் உள்ளது. நாங்கள் ஆட்சி பொறுப்பேற்பதற்கு முன்வரை, சமையல் எரிவாயு இணைப்பு, 55 சதவீதமாகத் தான் இருந்தது. 60ஆண்டுகளில், 15 கோடி சமையல் எரிவாயு இணைப்புகள் மட்டுமே வழங்கப்பட்டு இருந்தன. நாங்கள் ஆட்சியில் அமர்ந்த பின், கடந்த நான்கு ஆண்டுகளில் மட்டும், 12 கோடி சமையல் எரிவாயு இணைப்புகள் வழங்கப்பட்டு உள்ளன. அதேபோல், குழாய் மூலம் எரிவாயு இணைப்பு பெற்றவர்கள் எண்ணிக்கை, 24 லட்சமாக இருந்தது. தற்போது இந்த எண்ணிக்கை, 2 கோடியாக உயர்ந்து உள்ளது. தற்போது, நாடு முழுவதும், 66 மாவட்டங்களில், குழாய் மூலம் சமையல் எரிவாயு வினியோகம் செய்யப்படுகிறது. 174 மாவட்டங்களில், இந்த திட்டப்பணிகள் நடந்து வருகின்றன. இன்னும் சில ஆண்டுகளில், 400 மாவட்டங்களில், குழாய் எரிவாயு இணைப்பு திட்டத்தை செயல்படுத்த இலக்கு நிர்ணயிக்கப்பட்டு உள்ளது. கடந்த லோக்சபா தேர்தலின் போது, 'அரசை மாற்றினால் மட்டும் போதாது; வேலை செய்யும் முறை, கலாசாரம், திட்டங்களை செயல்படுத்தும் முறை ஆகியவற்றை மாற்ற வேண்டும்' என்றேன்; அதை மக்கள் ஏற்றதால் தான், இந்த சாதனையை படைக்க முடிந்தது. இவ்வாறு பிரதமர் மோடி பேசினார். நகர எரிவாயு திட்டம், தமிழகத்தில், காஞ்சிபுரம், திருப்பூர் உள்ளிட்ட, 10 மாவட்டங்களில் செயல்படுத்தப்பட உள்ளது. முதல்கட்டமாக, சேலம், கோவை நகரங்கள், இந்த திட்டத்தில் இணைக்கப்பட்டு உள்ளன. |
|||||
by Mani Bharathi on 25 Nov 2018 0 Comments | |||||
கருத்துகள் | |
|
உங்கள் கருத்துகள் பதிவு செய்ய | ||
|